ഖത്തറിന്റെ വരാനിരിക്കുന്ന ശൈത്യകാല ഫിഫ ലോകകപ്പ് മുൻ ലോകകപ്പുകളെ അപേക്ഷിച്ച് ഉയർന്ന നിലവാരത്തിലുള്ള ഫുട്ബോൾ നൽകുമെന്ന് മുൻ ഇംഗ്ലണ്ട് ക്യാപ്റ്റനും ഖത്തർ 2022 അംബാസഡറുമായ ഡേവിഡ് ബെക്കാം അഭിപ്രായപ്പെട്ടു.
ലോകകപ്പ് ടൂർണമെന്റിന്റെ സമയം അവരുടെ മികച്ച ശാരീരികമൂൻതൂക്കത്തോടെ മത്സരിക്കാൻ കളിക്കാരെ അനുവദിക്കുമെന്ന് ബെക്കാം വിശ്വസിക്കുന്നു.
“25 മത്സരങ്ങൾ കളിച്ചതിന് ശേഷമാണ് കളിക്കാർ ഈ ലോകകപ്പിലേക്ക് വരുന്നത്. അതിനാൽ അവർ പുതുമയോടെയും ആവേശത്തോടെയും എത്തും. അവരുടെ ഊർജം ഉയർന്ന തലത്തിലായിരിക്കും, അതിനാൽ നിങ്ങൾ പിച്ചിൽ കാണാൻ പോകുന്നത് മറ്റേതൊരു ലോകകപ്പിലും കാണാത്തതായിരിക്കുമെന്ന് ഞാൻ കരുതുന്നു,” അൽ ജസീറയ്ക്ക് നൽകിയ അഭിമുഖത്തിൽ ബെക്കാം പറഞ്ഞു.
ഖത്തറിലെ കഠിനമായ മരുഭൂമി കാലാവസ്ഥ ലോകകപ്പിന്റെ ചരിത്രത്തിലാദ്യമായി ആഗോള ടൂർണമെന്റിനെ അതിന്റെ പരമ്പരാഗത വേനൽക്കാല ഷെഡ്യൂളിൽ നിന്ന് ശൈത്യകാലത്തേക്ക് മാറ്റാൻ ഫിഫയെ നിർബന്ധിതരാക്കുകയായിരുന്നു.
ഈ വർഷത്തെ ലോകകപ്പിനെ ഉൾക്കൊള്ളാൻ ലോകമെമ്പാടുമുള്ള ടൂർണമെന്റുകളുടെ ഷെഡ്യൂളിന് മാറ്റം വരുത്തേണ്ടി വന്നതിനാൽ ഈ തീരുമാനത്തിനെതിരെ യൂറോപ്പിലെ ഫുട്ബോൾ ആരാധകരിൽ നിന്ന് നിരവധി വിമർശനങ്ങൾ ഉയർന്നിരുന്നു.
Content Highlights: Qatar World Cup will produce better football due to mid season break: Beckham