ദോഹ: ഖത്തർ ചേംബറിന്റെ (ക്യുസി) സ്പോൺസർഷിപ്പിലും ഖത്തർ ബിസിനസ്സ് വുമൺ ഫോറത്തിന്റെ പിന്തുണയിലും ‘മേർവാദ് എക്സിബിഷന്റെ’ ഏഴാമത് പതിപ്പ് ജനുവരി അഞ്ചിന് ഖത്തർ നാഷണൽ കൺവെൻഷൻ സെന്ററിൽ (ക്യുഎൻസിസി) ആരംഭിക്കും.
വോഗ് ഈവന്റ് കമ്പനി സംഘടിപ്പിക്കുന്ന ആറ് ദിവസത്തെ എക്സ്പോയിൽ ഖത്തറിൽ നിന്നുള്ള 140-ലധികം പ്രമുഖ വനിതാ സംരംഭകരുടെ ഉൽപ്പന്നങ്ങളും ഡിസൈനുകളും ജിസിസി രാജ്യങ്ങൾ, ലെബനൻ, തുർക്കി, ഈജിപ്ത്, ഇന്ത്യ എന്നിവിടങ്ങളിൽ നിന്നുള്ള ഉത്പന്നങ്ങളും പ്രദർശിപ്പിക്കും.
160 സ്റ്റാൻഡുകളിലുടനീളം പ്രദർശകർ 2022 ലെ ശൈത്യകാലത്തും വസന്തകാലത്തും ഉപയോഗിക്കാൻ സാധിക്കുന്ന ഫാഷൻ ഡിസൈനുകളിൽ അവരുടെ ഏറ്റവും പുതിയ കണ്ടുപിടുത്തങ്ങളും സ്ത്രീകളുടെ സപ്ലൈകളുടെയും ആക്സസറികളുടെയും ഒരു ശേഖരം പ്രദർശിപ്പിക്കും. പ്രമുഖ വ്യവസായികളുടെയും സംരംഭകരുടെയും സാന്നിധ്യത്തിൽ ഖത്തർ ചേംബർ ബോർഡ് അംഗവും ഖത്തർ ബിസിനസ് വുമൺ ഫോറം ചെയർപേഴ്സണുമായ ഇബ്തിഹാജ് അൽ അഹമ്മദനി എക്സ്പോ ഉദ്ഘാടനം ചെയ്യും.
സന്ദർശകർക്ക് ഫാഷൻ, ആഡംബര വസ്ത്രങ്ങൾ എന്നിവയുടെ ഏറ്റവും പുതിയ ട്രെൻഡുകളും അബായകളുടെ ഏറ്റവും പുതിയ ഡിസൈനുകളും പരിചയപ്പെടാൻ മികച്ച അവസരമാണ് പ്രദർശനം ഒരുക്കുന്നത്. സമീപ വർഷങ്ങളായി എക്സ്പോ സ്ത്രീ ഫാഷൻ മേഖലയിൽ
കാര്യമായ വികസനത്തിന് സാക്ഷ്യം വഹിച്ചിട്ടുണ്ടെന്നും പ്രാദേശിക തലത്തിൽ മാത്രമല്ല അറബ്, അന്തർദേശീയ തലങ്ങളിലും മികച്ച പ്രശസ്തി നേടിയിട്ടുണ്ടെന്നും അൽ അഹമ്മദനി പ്രസ്താവനയിൽ പറഞ്ഞു.