??ഖത്തർ തൊഴിൽ രംഗത്തെ വിമർശിക്കുന്നവരോട്! ഞങ്ങൾ ഇവിടെ സുരക്ഷിതരും സന്തോഷത്തിലുമാണ്.
ലോകത്തിലെ തൊഴിൽ വിപണികളിൽ ഉയർന്ന സ്ഥാനവും നിലവാരവും പുലർത്തുന്ന രാജ്യമാണ് ഖത്തർ.
ലോകത്തിന്റെ മിക്ക രാജ്യങ്ങളിലെയും തൊഴിലാളികൾ തൊഴിൽ ചെയ്യുന്ന ഇടം. ഗൾഫ് നാടുകളിലാണ് പൊതുവെ ബ്ലൂ കോളർ വിഭാഗത്തിൽ പെടുന്നവർ ജോലിക്കായി മറ്റു രാജ്യങ്ങളിൽ നിന്ന് എത്തിച്ചേരുന്നത്.
ഗൾഫ് രാജ്യങ്ങളിൽ പൊതുവെ, ഉന്നത തൊഴിലുകളല്ലാതെ തൊഴിൽ രംഗത്ത് സാധ്യത വളരെ വിരളമായി കൊണ്ടിരിക്കുകയാണ്.
സൗദി പോലെയുള്ള രാജ്യങ്ങളിൽ വൻ വ്യാപാരികൾക്കും ഉന്നത ജോലിക്കും മാത്രമായിരിക്കും, വളരെ സമീപ ഭാവിയിൽ സാധ്യത തീരെ ഇല്ലാതാവുമെന്നും കണക്കാക്കുന്നു.
അതേ സമയം ഗൾഫ് മേഖലയിൽ വരും വർഷങ്ങളിൽ ഏറ്റവും കൂടുതൽ സാമ്പത്തിക വളർച്ച നേടുന്ന രാജ്യം ഖത്തർ ആയിരിക്കുമെന്ന് അന്താരാഷ്ട്ര ഏജൻസികളുടെ വിലയിരുത്തൽ.
ഖത്തറിൽ ഇനിയും വികസനവും അതിനനുസരിച്ച് തൊഴിലാളികളുടെയും മറ്റുള്ളവരുടെയും സേവനം ആവശ്യമായി വരികയും അവസരങ്ങളുടെ നാടായി മാറുമെന്നും കണക്കാക്കുന്നു.
കാലത്തിനനുസൃതമായി, പ്രത്യേകിച്ചും 2017 മുതൽ ഏറെ ഗുണപരമായ മാറ്റങ്ങളാണ് ഖത്തർ തൊഴിൽ നിയമ രംഗത്ത് വരുത്തിയത്.
1️⃣ വിദേശ തൊഴിലാളികൾക്ക് നേരെത്തയുണ്ടായിരുന്ന എക്സിറ്റ് പെർമിറ്റ് സിസ്റ്റം ഒഴിവാക്കിയത് കൊണ്ട് ഏത് സമയത്തും പോവാനും തിരികെ വരാനും സാധിച്ചു.
2️⃣ പഴയ സ്പോൺസർഷിപ്പ് സമ്പ്രദായം എടുത്ത് കളഞ്ഞ് പുതിയ തൊഴിലിലേക്ക് മാറാനും തൊഴിലാളികൾക്ക് അനുമതി നൽകി.
ഈ നിയമം വന്ന് ഒരൊറ്റ വർഷം കൊണ്ട് രണ്ട് ലക്ഷത്തിലധികം പേരാണ് തങ്ങളുടെ തൊഴിലിടങ്ങൾ മാറിയതെന്ന് ഇൻറർനാഷണൽ ലേബർ ഓർഗനൈസേഷൻ (ILO) രേഖകൾ വ്യക്തമാക്കുന്നു. നിയമം പൂർണ്ണാടിസ്ഥാനത്തിൽ തന്നെ നടപ്പാക്കാനുള്ള ഖത്തറിന്റെ പ്രതിബദ്ധതയാണ് ഇതുവഴി തെളിയുന്നത്.
3️⃣ 2021 മാർച്ചിൽ കൊണ്ടുവന്ന മിനിമം വേതന നിയമം ദേശഭാഷാ വ്യത്യാസം കൂടാതെ എല്ലാവർക്കും മിനിമം വേതനം ലഭ്യമാക്കി. ജോലിയുടെ സ്വഭാവം നോക്കാതെ, വീട്ടു ജോലിക്കാർ ഉൾപ്പെടെയുള്ളവർക്ക് മിനിമം വേതനം ഉറപ്പാക്കാൻ ഈ നിയമം വഴി സാധിച്ചുവെന്നത് ഗൾഫ് മേഖലയിൽ തന്നെ മാതൃകയായി.
4️⃣ ശമ്പളം നൽകുന്നത് ബേങ്ക് വഴിയാക്കുകയും കൃത്യസമയത്ത് ശമ്പളം ലഭ്യമാക്കിയില്ലെങ്കിൽ തൊഴിലുടമക്കെതിരെ ശക്തമായ നടപടികൾ കൈകൊണ്ടു വരുന്നു. അത് കൊണ്ട് wage theft എന്ന് ലോകം ചർച്ച ചെയ്യുന്ന വലിയ പ്രശ്നം ഖത്തറിൽ താരതമ്യേന കുറവാണ് എന്നതാണ് വസ്തുത.
5️⃣ തൊഴിലാളികൾക്ക് തങ്ങളുടെ പരാതികളും നിർദ്ദേശങ്ങളും ഓൺലൈൻ വഴി സമർപ്പിക്കാനുള്ള സംവിധാനം ഏർപ്പെടുത്തിയതിന് പുറമെ തൊഴിലാളിക്ക് വേണ്ടി മറ്റൊരാൾക്ക് പോലും പരാതി സമർപ്പിക്കാനും സാധിക്കും.
6️⃣ ചൂട് കാലം പോലുളള പ്രതികൂല കാലാവസ്ഥയിൽ ജോലി ചെയ്യുമ്പോൾ കൃത്യമായ വിശ്രമസമയവും തൊഴിലാളികളുടെ സുരക്ഷിതത്വവും ഉറപ്പു വരുത്താനുള്ള നിയമങ്ങൾ കൊണ്ടുവരാനും സാധിച്ചു.
7️⃣ തൊഴിലിടങ്ങളിലെ അപകടങ്ങൾ താരതമ്യേന കുറവായാണ് രേഖപ്പെടുത്തിയിരിക്കുന്നത്. അപകടം സംഭവിച്ച കേസുകളിൽ കൃത്യമായ നഷ്ടപരിഹാരങ്ങളും നൽകിയിട്ടുണ്ട്.
8️⃣ സൗജന്യ മെഡിക്കൽ ഫെസിലിറ്റി എല്ലാവർക്കും നൽകുന്ന രാജ്യമാണ് ഖത്തർ . ക്യാൻസർ അടക്കമുള്ള അസുഖങ്ങൾക്ക് വർഷങ്ങളോളം സൗജന്യ ചികിൽസയാണ് ലഭിക്കുന്നതെന്ന് ഓർക്കണം. കോവിഡ് കാലത്ത് സ്വദേശികൾക്കും താമസക്കാർക്കും യാതൊരു വിവേചനവും കാണിക്കാതെ നൽകിയ ചികിൽസയും കരുതലും ലോകം പഠിക്കേണ്ടതാണ്.
9️⃣ ഇനി മുതൽ ഇൻഷൂറൻസ് പരിരക്ഷ എല്ലാവർക്കും ഉറപ്പ് വരുത്തുന്നതിന്റെ ഭാഗമായി റസിഡൻസ് പെർമിറ്റ് പുതുക്കുമ്പോൾ ഇൻഷൂറൻസ് വേണമെന്ന നിബന്ധന കൊണ്ടുവന്നു. ഇത് സ്വകാര്യ ആശുപത്രികളിൽ ചികിൽസ ലഭ്യമാക്കുന്നതിന് ഏറെ സഹായിക്കും.
? തൊഴിലാളികൾക്ക് തങ്ങളുടെ താമസ രേഖകൾ ശരിയാക്കി ഖത്തറിൽ തന്നെ തുടരാനോ നാട്ടിലേക്ക് മടങ്ങി പോയി പുതിയ വിസയിൽ വരാനോ സാധിക്കുന്നതിനായി ഒക്ടോബർ 2021 മുതൽ ഏപ്രിൽ 2022 വരെയുള്ള നീണ്ട കാലയളവിൽ ഗ്രേസ് പീരിയേഡ് അനുവദിച്ചു.
1️⃣1️⃣ പ്രസ്തുത ഗ്രേസ് പീരിയേഡ് ആനുകൂല്യം വഴി പതിനായിരങ്ങളാണ് രേഖകൾ ശരിയാക്കി പുതിയ ജോലികൾ നേടിയത്.
1️⃣2️⃣ തൊഴിലാളി സംരക്ഷണത്തിനായി റിക്രൂട്ട്മെൻറ് ഏജൻസികളുടെ പ്രവർത്തനങ്ങൾ സസൂഷ്മം വീക്ഷിക്കുകയും നടപടിക്രമങ്ങൾ പാലിക്കാത്ത ഏജൻസികൾക്കെതിരെ നിരന്തരം നടപടികൾ സ്വീകരിക്കുകയും ചെയ്യുന്നു.
1️⃣3️⃣ തൊഴിലാളി സംരക്ഷണ പ്രക്രിയകൾ ഖത്തറിൽ കാലാനുസൃതമായി തുടർന്ന് കൊണ്ടിരിക്കുകയും ചെയ്യുന്നു.
1️⃣4️⃣ തൊഴിലാളി സംരക്ഷണ നിയമങ്ങളെയും നടപടിക്രമങ്ങളെയും വിവരിച്ച് ധാരാളം ശിൽപശാലകളും സോഷ്യൽ മീഡിയ വഴിയും ദൃശ്യ, ശ്രാവ്യ അച്ചടി മാധ്യമങ്ങൾ വഴിയും ജനങ്ങളിൽ എത്തിക്കുകയും ചെയ്യുന്നു.
ഖത്തറിൽ നടക്കുന്ന ഇത്തരം പരിഷ്ക്കരണ പ്രവർത്തനങ്ങളുടെ ഗുണഭോക്താക്കളാണ് ഞാൻ അടക്കമുള്ള പ്രവാസികൾ.
ഇത്തരം പുരോഗതികളെ കണ്ടില്ലെന്ന് നടിച്ച് ഖത്തറിലെ തൊഴിലാളികളുടെ കാര്യത്തിൽ നിക്ഷിപ്ത താത്പര്യാർത്ഥം വാസ്തവ വിരുദ്ധ വാർത്തകൾ നൽകുന്ന ദേശാന്തരീയ മാധ്യമങ്ങളോടും സാമൂഹ്യ മാധ്യമങ്ങൾ കൈകാര്യം ചെയ്യുന്നവരോടും ഒന്നേ പറയാനുള്ളൂ.
ഞങ്ങൾ ഇവിടെ?? സുരക്ഷിതരാണ്. എല്ലാവർക്കും സുരക്ഷിതത്വവും ഐശ്വര്യവും സമാധാനവും നേരുന്നു.
✍️അബ്ദുൽ റഊഫ് കൊണ്ടോട്ടി.
©️Abdul Raoof Kondotty – Expat Welfare
Content Highlights : Abdul Raoof kondoty on issues about jobs in Qatar